កញ្ចប់បារីដែលកំពុងត្រូវបានគេដាក់លក់នៅតាមទីផ្សារនាពេលបច្ចុប្បន្ន។ ផា លីណា
ភ្នំពេញៈ អ្នកជំនាញផ្នែកសុខភាព រំពឹងថា ការដាក់សារព្រមានជារូបភាព ទំហំ ៥០ ភាគរយលើកញ្ចប់បារីដាក់លក់លើទីផ្សារកម្ពុជានឹងអាចកាត់បន្ថយអត្រាអ្នកជក់ និងអ្នកស្លាប់បានច្រើន ខណៈច្បាប់ស្តីពីការត្រួតពិនិត្យថ្នាំជក់ដែលមានមាត្រាកំណត់ពីសារព្រមានរូបភាពនេះនឹងត្រូវរដ្ឋសភាប្រជុំពិភាក្សា បន្ទាប់ពីពិធីបុណ្យចូលឆ្នាំខ្មែរខាងមុខ។
ភ្នំពេញៈ អ្នកជំនាញផ្នែកសុខភាព រំពឹងថា ការដាក់សារព្រមានជារូបភាព ទំហំ ៥០ ភាគរយលើកញ្ចប់បារីដាក់លក់លើទីផ្សារកម្ពុជានឹងអាចកាត់បន្ថយអត្រាអ្នកជក់ និងអ្នកស្លាប់បានច្រើន ខណៈច្បាប់ស្តីពីការត្រួតពិនិត្យថ្នាំជក់ដែលមានមាត្រាកំណត់ពីសារព្រមានរូបភាពនេះនឹងត្រូវរដ្ឋសភាប្រជុំពិភាក្សា បន្ទាប់ពីពិធីបុណ្យចូលឆ្នាំខ្មែរខាងមុខ។
ការរំពឹងនេះ ធ្វើឡើងក្នុងសិក្ខាសាលាស្តីពីការផ្សព្វផ្សាយអំពីផលប៉ះពាល់ នៃការប្រើប្រាស់ថ្នាំជក់ នៅទីស្តីការ ក្រសួងសុខាភិបាល កាលពីថ្ងៃចន្ទ។ អនុប្រធាននៃមជ្ឈមណ្ឌលជាតិលើកកម្ពស់សុខភាព លោកស្រី វេជ្ជបណ្ឌិត ឈា ឆដាភា បានឲ្យដឹងថា សារព្រមានសុខភាពជារូបភាព ដែលត្រូវបានចែងក្នុងមាត្រានៃសេចក្តីព្រាងច្បាប់នេះមានសារៈសំខាន់ និងមានប្រសិទ្ធភាពខ្ពស់ ដោយបង្ហាញនូវព័ត៌មានពិតនៃគ្រោះថ្នាក់បណ្តាលមកពីផលិតផលថ្នាំជក់បានច្បាស់លាស់ជាងសារជាអក្សរ។
លោកស្រីថា៖ «សារព្រមាននេះនឹងជួយលើកទឹកចិត្តឲ្យអ្នកជក់លះបង់ការប្រើប្រាស់ថ្នាំជក់ព្រោះតែជំងឺនានាដែលកើតចេញពីការជក់នេះ ហើយក៏អាចជួយការពារកុមារ និងយុវវ័យពីការចាប់ផ្តើមប្រើផលិតផលថ្នាំជក់ និងជួយអ្នកលះបង់មិនលាប់ឡើងវិញ»។
លោកស្រី បន្តថា៖ «ច្បាប់ស្តីពីការត្រួតពិនិត្យថ្នាំជក់ បានឈានចូលដល់សភាហើយដែលនឹងមានការពិភាក្សាឆាប់ៗខាងមុខនេះ។ យើងជឿជាក់ថា មាត្រាស្តីពីសារព្រមានជារូបភាពនេះ អាចរួមចំណែកធំក្នុងការកាត់បន្ថយនូវអ្នកជក់ និងអត្រានៃអ្នកស្លាប់ផងដែរ»។
តំណាងអង្គការសុខភាពពិភពលោកប្រចាំកម្ពុជា លោក វេជ្ជបណ្ឌិត យ៉ិល ដារ៉ាវុធ បានឲ្យដឹងថា អង្គការសុខភាពពិភពលោកនៅតែអំពាវនាវឲ្យរដ្ឋាភិបាលកម្ពុជា អនុម័ត និងអនុវត្ត ដោយមិនពន្យារពេលលើបទដ្ឋានគតិយុត្តិ ដែលទាមទារឲ្យមានសារព្រមានជារូបភាព ដែលមានទំហំធំ លើកញ្ចប់ផលិតផលថ្នាំជក់ ដោយអនុលោមតាមមាត្រា ១១ នៃអនុសញ្ញាស្តីពីការត្រួតពិនិត្យថ្នាំជក់។
លោកបន្តថា៖ «តាមបទពិសោធនៃប្រទេសដទៃឧស្សាហករថ្នាំជក់ ក៏បានព្យាយាមរារាំងមិនឲ្យមានសារព្រមានសុខភាពជារូបភាព ដោយអះអាងថា គ្មានភ័ស្តុតាងច្បាស់លាស់ពីផលប្រយោជន៍នៃសារព្រមាននេះ បង្កនូវការរត់ពន្ធកាន់តែច្រើន ចំណែកឯអនុសញ្ញាស្តីពីការត្រួតពិនិត្យថ្នាំជក់បានតម្រូវត្រឹមតែសារព្រមានសុខភាពជាអក្សរដែលមានទំហំត្រឹម ៣០ ភាគរយប៉ុណ្ណោះ តែការលើកឡើងនេះ មិនត្រូវបាន WHO ទទួលយកនោះទេ»។
នាយករងនៃមជ្ឈមណ្ឌលជាតិលើកកម្ពស់សុខភាព លោក ស៊ិន សុវណ្ណ បានព្រមានថា ថ្នាំជក់គឺជាឃាតករមួយដ៏សាហាវដែលសម្លាប់មនុស្សដោយស្ងប់ស្ងាត់ ជាពិសេសមានផលប៉ះពាល់ដល់សុខភាព សេដ្ឋកិច្ច និងបរិស្ថានជុំវិញខ្លួន។ «ការដាក់ចេញនូវវិធានការសារព្រមានជារូបភាពនេះនឹងធ្វើឲ្យប្រជាជនដែលធ្លាប់ជក់បារីនឹងបោះបង់ទម្លាប់នោះចោលដោយសារតែឃើញសារព្រមានជារូបភាពលើកញ្ចប់បារី»។
តាមរយៈរបាយការណ៍អង្គការសុខភាពពិភពលោកឲ្យដឹងថា ក្នុងចំណោមប្រទេសអាស៊ានទាំង ១០ ការអនុម័តច្បាប់ស្តីពីវិធានការត្រួតពិនិត្យថ្នាំជក់មានតែកម្ពុជា ១ គត់ ដែលពុំទាន់បានអនុម័តច្បាប់ហាមជក់បារីនៅឡើយ ខណៈប្រទេសឡាវ ប្រ៊ុយណេ ថៃ មីយ៉ាន់ម៉ា ឥណ្ឌូនេស៊ី ម៉ាឡេស៊ី វៀតណាម ហ្វីលីពីន និងសិង្ហបុរី មានច្បាប់ហាមជក់បារី និងយកពន្ធបារីខ្ពស់។ របាយការណ៍ដដែលនេះ ក៏បានបង្ហាញថា អត្រាអ្នកស្លាប់ដោយសារថ្នាំជក់ទូទាំងពិភពលោកមានប្រមាណ ៦ លាននាក់ក្នុង ១ ឆ្នាំ ក្នុងនោះអត្រាស្លាប់នៃពលរដ្ឋកម្ពុជា មានជាង ១ ម៉ឺននាក់ក្នុង ១ ឆ្នាំ ក្នុងចំណោមអ្នកជក់ និងចុកថ្នាំ សរុប ២ លាននាក់។ ចំនួននេះ ត្រូវបានរំពឹងថា នឹងកើនដល់ ៨ លាននាក់នៅឆ្នាំ ២០៣០ ។
គួររំឭកថា សេចក្តីព្រាងច្បាប់ស្តីពីការត្រួតពិនិត្យថ្នាំជក់ ដែលត្រូវបានរៀបចំតាក់តែងតាំងពីឆ្នាំ ២០០៣ មក ត្រូវបានគណៈរដ្ឋមន្រ្តី អនុម័តកាលពីថ្ងៃទី ៥ ខែធ្នូ ឆ្នាំ ២០១៤ ដោយមាន ១៣ ជំពូក និង ៤៩ មាត្រា ហើយត្រូវបានគេរំពឹងថា នឹងត្រូវរដ្ឋសភា ប្រជុំពិភាក្សានៅចុងខែមេសានេះ
៕
៕
No comments:
Post a Comment