បន្ទាប់ពីលទ្ធផលនៃការប្រកួតក្នុងថ្ងៃទី៣ គឺថ្ងៃទី២៦ ខែមីនា នៃព្រឹត្តិការណ៍ជម្រុះបាល់ទះLeo Cup នៅមណ្ឌលខេត្តព្រះសីហនុនោះ គេបានសម្លឹងឃើញក្រុមដែលត្រូវបានឡើង និងក្រុមដែលត្រូវហាលអាវបណ្ដើរៗហើយ។
ការប្រកួតនាថ្ងៃ២៦ ខែមីនានោះ មាន៣ប្រកួតគឺពូល A មាន២ប្រកួត និង ពូលB មាន១ប្រកួត។ សម្រាប់២ប្រកួតរបស់ពូល A គឺក្រុមយុវជនការងារខេត្តកំពតឈ្នះក្រុមសកលវិទ្យាល័យគ្រប់គ្រង និងសេដ្ឋកិច្ច៣សិតទល់០ក្នុងពិន្ទុ២៥ទល់១៩-២៥ទល់១១ និង២៥ទល់១៨។ ២ប្រកួតរបស់ក្រុមការងារយុវជនខេត្តកំពតឈ្នះទាំង២ប្រកួត មាន៦ពិន្ទុ ឯ៣ប្រកួតរបស់ក្រុមសកលវិទ្យាល័យគ្រប់គ្រង និងសេដ្ឋកិច្ចឈ្នះ២ប្រកួត ចាញ់១
ប្រកួត មាន៦ពិន្ទុដូចក្រុមការងារយុវជនខេត្តកំពតដែរ តែក្រុមការងារយុវជនខេត្តកំពតនៅសល់មួយប្រកួតទៀត ខណៈដែលក្រុមសកលវិទ្យាល័យគ្រប់គ្រង និងសេដ្ឋកិច្ចបានបញ្ចប់ការប្រកួតទៅហើយនោះ។
មួយប្រកួតទៀតរបស់ពូល A ក្រុមយុវជន អូរ សំអាត ចាញ់ក្រុមស្ដារក្រោន០ទល់៣សិត ក្នុងពិន្ទុ១៤ ទល់២៥ - ២៨ ទល់៣០ និង២៣ ទល់២៥។ ៣ប្រកួតរបស់ក្រុមយុវជនអូរសំអាតចាញ់ទាំង ៣ប្រកួតត្រូវជ្រុះធ្លាក់ចេញពីការប្រកួតមុនគេ។
ដូច្នេះសម្រាប់ចំណាត់ថ្នាក់ក្នុងពូលAនេះនឹងបង្ហាញឲ្យដឹងនៅពេល ដែលក្រុមស្ដារក្រោន ប្រកួតជាមួយក្រុមការងារយុវជនខេត្តកំពតក្នុងជុំបញ្ចប់ ព្រោះត្រូវកាត់ក្តីជាមួយក្រុមសកលវិទ្យាល័យគ្រប់គ្រង និងសេដ្ឋកិច្ចដើម្បីបូកសរុបពិន្ទុយកពីរក្រុមដែលត្រូវឡើងទៅ ប្រកួតបន្តនៅវគ្គពាក់កណ្ដាលផ្តាច់ព្រ័ត្រនោះ។
ចំពោះមួយប្រកួតរបស់ពូល B ក្រុមបញ្ជាការដ្ឋានកងទ័ពជើងទឹក ប្រកួតឈ្នះក្រុមសកលវិទ្យាល័យ ហ៊ុន សែនមិត្តភាព ៣សិត ទល់០ ក្នុងពិន្ទុ២៥ ទល់១៣-២៥ ទល់៩ និង២៥ ទល់២០។ ២ប្រកួតរបស់បញ្ជាការដ្ឋានកងទ័ពជើងទឹកឈ្នះទាំង២ប្រកួត ក្នុងខណៈដែល២ប្រកួតរបស់ក្រុមវិទ្យាល័យ ហ៊ុន សែន មិត្តភាពចាញ់ទាំង២ប្រកួតនោះ។
សម្រាប់ពូល B នេះ ក៏នឹងដឹងលទ្ធផលច្បាស់ ក្រោយពីការជួបគ្នារវាងក្រុមបញ្ជាការដ្ឋានកងទ័ពជើងទឹក ជាមួយក្រុមឆ្នេរស្អាតទេសចរណ៍ ហើយក្រុមវិទ្យាល័យ ហ៊ុន សែន មិត្តភាព ជាមួយ ក្រុមវិទ្យាល័យ ហ៊ុន សែន ស្មាច់ដែង៕
No comments:
Post a Comment