ភ្នំពេញៈ សមត្ថកិច្ច និងមន្ត្រីក្រសួងយុត្តិធម៌ទទួលស្គាល់ថាកិច្ចសហការអនុវត្តច្បាប់ រវាងតុលាការ អយ្យការ និងនគរបាលយុត្តិធម៌ទូទាំងប្រទេសនាពេលកន្លងមកនៅមានភាពខ្វះ ចន្លោះនៅឡើយជាហេតុនាំឱ្យមានអំពើចោរលួច ឆក់ និងបទល្មើសព្រហ្មទណ្ឌចេះតែកើតមានជាបន្តបន្ទាប់ជាពិសេសបទល្មើស កើតឡើងថ្មីៗនេះដែលបង្កឱ្យមានភាពអសន្តិសុខក្នុងសង្គម។
ការបង្ហាញពីភាពខ្វះចន្លោះរបស់ខ្លួនក្នុងការអនុវត្តច្បាប់នេះ ត្រូវបានលើកឡើងកាលពីម្សិលមិញក្នុងកិច្ចប្រជុំលើកទីពីរនៅក្រសួង យុត្តិធម៌ដែលមានសមាសភាពមន្ត្រីជាន់ខ្ពស់នៃក្រសួងនានា ព្រះរាជអាជ្ញា ប្រធានតុលាការស្ថាប័នពាក់ព័ន្ធ និងស្នងការនគរបាលខេត្តទូទាំងប្រទេសមកចូលរួមដើម្បីធ្វើរបាយការណ៍ នៃបញ្ហាដែលកំពុងប្រឈមផ្តល់ជាយោបល់ និងស្វែងរកដំណោះស្រាយរួមគ្នា។
អ្នកនាំពាក្យក្រសួងយុត្តិធម៌លោក គឹម សន្តិភាព ថ្លែងថាក្រោយពីបានស្តាប់លទ្ធផលនៃកិច្ចប្រជុំខាងមន្ត្រីអនុវត្ត ច្បាប់រួមទាំងចៅក្រម ព្រះរាជអាជ្ញា និងមន្ត្រីនគរបាលយុត្តិធម៌ ស្ថាប័នពាក់ព័ន្ធ នឹងបង្កើនសមត្ថភាពបន្ថែមទៀតក្នុងការបង្ការ បង្ក្រាប និងផ្តន្ទាទោសជនល្មើសឱ្យខានតែបានក្នុងគោលបំណងពង្រឹងនូវ សុវត្ថិភាពសាធារណៈរបស់សង្គមជាតិ។
លោកបន្ថែមថា ខាងសមត្ថកិច្ចនឹងប្រមូលផ្តុំព័ត៌មានរួមគ្នាធ្វើយ៉ាងណាឱ្យ កិច្ចសហប្រតិបត្តិការរវាងស្ថាប័នពាក់ព័ន្ធមានភាពល្អប្រសើរជាងមុន ក្នុងការបង្ក្រាប និងទប់ស្កាត់បទល្មើសឱ្យបានជាអតិបរមា។
លោកបន្តថា៖ «អ្វីដែលជាបញ្ហាប្រឈមរវាងមន្ត្រីអនុវត្តច្បាប់គឺទាក់ទងនឹងបញ្ហា នីតិវិធីនេះឯងហើយបញ្ហានេះឯងដែលក្រសួងយុត្តិធម៌រៀបចំក្រុម ការងារពិនិត្យមើលឡើងវិញថាតើទស្សនៈយល់គ្នារវាងអ្នកអនុវត្ត ច្បាប់ឱ្យខិតទៅរកភាពស៊ីចង្វាក់តែមួយ»។
លោក សន្តិភាព ឱ្យដឹងទៀតថារដ្ឋមន្ត្រីក្រសួងយុត្តិធម៌លោក អង្គ វង្សវឌ្ឍានា ក៏មានផែនការជួបជាមួយគណៈកម្មការជាតិដើម្បីពិនិត្យមើលនូវលក្ខខណ្ឌ នីតិវិធី និងបែបបទនៃការស្នើបន្ធូរបន្ថយទោសទណ្ឌិតទូទាំងរាជធានីខេត្តផង ដែរ។
អគ្គស្នងការរងនគរបាលជាតិលោក ម៉ក់ ជីតូ ថ្លែងថាបច្ចុប្បន្នខាងសមត្ថកិច្ចកំពុងដុតដៃដុតជើងក្នុងការ ទប់ស្កាត់ និងបង្ការរាល់បទល្មើសដែលកើតមាន។
លោកបញ្ជាក់ថា៖ «ជារួមទៅបទល្មើសព្រហ្មទណ្ឌយើងទទួលស្គាល់ថាក្រោយនេះមានបទល្មើស កើតឡើងច្រើនតែបើគិតប្រៀបធៀបជាមួយឆ្នាំមុនមានការថយចុះ»។
នៅពេលអ្នកសារព័ត៌មានសួរថា ហេតុអ្វីបានជាក្រុមចោរប្លន់មានអាវុធស្ទើរគ្រប់ដៃ លោក ម៉ក់ ជីតូ ឆ្លើយថា ការគ្រប់គ្រងអាវុធមានការស្មុគស្មាញខ្លាំងដោយលោកថា ខាងនគរបាលគ្រប់គ្រងតែអាវុធស្របច្បាប់តែប៉ុណ្ណោះ តែអាវុធខុសច្បាប់ខាងលោកមិនទាន់គ្រប់គ្រងបានទេ។ តែលោកថាក្រោយពីមានបញ្ហានេះទាំងកងរាជអាវុធហត្ថអង្គស្នងការនគរបាល ជាតិបានពិនិត្យឡើងវិញក្នុងការគ្រប់គ្រងអាវុធ។ បើតាមលោក ម៉ក់ ជីតូ បទល្មើសដែលកើតមានក្នុងឆ្នាំ ២០១៥ មានការថយចុះ ១៤ ភាគរយបើប្រៀបធៀបនឹងឆ្នាំ ២០១៤ ក្នុងនោះបទល្មើសលួចមានចំនួន ១០៣៨ ករណីឆក់ ៩ ករណីប្លន់ ២៣០ ករណី និងបទល្មើសគ្រឿងញៀនមានចំនួន ៤៣៥ ករណី។
ចំណែកមេបញ្ជាការរងអាវុធហត្ថលើផ្ទៃប្រទេសលោក ហុង វិណុលថ្លែងថាខាងកម្លាំងរបស់លោកតែងតែចេញល្បាត ពួនស្ទាក់ និងពិនិត្យជាតិផ្ទុះជារឿយៗពោលមិនមែនទើបតែមានការណែនាំពី នាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃនោះទេ។ ទាក់ទងការគ្រប់គ្រងអាវុធវិញលោកថានៅពេលសួរចម្លើយអ្នកប្លន់ដែល ចាប់បានពួកគេសុទ្ធតែអះអាងថាបានប្រើប្រាស់អាវុធតៗគ្នា និងមិនមានការទិញពីក្រសួងការពារជាតិនោះទេ។
អ្នកសម្របសម្រួលនៃបណ្តាញរួបរួមដើម្បីគណនេយ្យភាពសង្គមលោក សន ជ័យ មើលឃើញថាកន្លងមកការអនុវត្តច្បាប់ពិតជាមានភាពខ្វះចន្លោះមែនដោយ លោកថានៅពេលសមត្ថកិច្ចចាប់បញ្ជូនក្រុមចោរទៅតុលាការតែបែរជា ព្រះរាជអាជ្ញាមួយចំនួនថាមិនមានភ័ស្តុតាងគ្រប់គ្រាន់ក្នុងការ ចោទប្រកាន់ដែលធ្វើឱ្យចោរប្លន់ទាំងនោះមានឱកាសបន្តធ្វើសកម្មភាព បន្តទៀត។
យ៉ាងណាក៏ដោយ លោកចង់ឃើញកិច្ចសហការគ្នារវាងអ្នកចាប់ចោរ និងអ្នកកសាងសំណុំរឿងក្នុងការបញ្ជូនជនល្មើសឱ្យទទួលខុសត្រូវ ចំពោះមុខច្បាប់។
លោកបញ្ជាក់ថា៖ «បើសិនការសហការមិនល្អជាពិសេសអ្នកចាប់នៅតែប្រឹងចាប់ហើយមានភាព មិនប្រក្រតីណាមួយកើតឡើងដូចជាការដោះលែងអ្នកទោសអីហ្នឹងពេលនោះ ហើយនឹងធ្វើឱ្យប្រព័ន្ធគេហៅថាអ្នកអនុវត្តនឹងបាក់ទឹកចិត្តដែរ ហើយពេលនោះនឹងធ្វើឱ្យអំពើប្លន់កើនឡើង»។
ការបើកកិច្ចប្រជុំពង្រឹងសមត្ថភាពមន្ត្រីពាក់ព័ន្ធនាពេលនេះធ្វើ ឡើងបន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរ កងកម្លាំងប្រដាប់អាវុធទូទាំងប្រទេសបង្កើនការប្រុងប្រយ័ត្ន និងវាយកម្ចាត់ក្រុមប្លន់ប្រដាប់អាវុធ និងក្រុមជួញដូរគ្រឿងញៀន៕
No comments:
Post a Comment