កាលជើងទី១នៅ Anfield ហង្សក្រហមបានបំបាក់ Man Utd ២-០ រួចហើយ ដូច្នេះយប់នេះ Liverpool មានសង្ឃឹមឡើងទៅវគ្គ៨ក្រុមច្រើនជាងបិសាចក្រហម។ ប៉ុន្តែតើក្រុមលោក Louis van Gaal អាចវាយបកទម្លាក់ Liverpool បានវិញ ឬយ៉ាងណា?
សម្ដីអ្នកចាត់ការ៖
Louis van Gaal អ្នកចាត់ការក្រុម Man Utd៖ “នេះជាឱកាសរបស់យើង ដើម្បីទម្លាក់ Liverpool។ យើងត្រូវតែជឿជាក់លើខ្លួនឯង ដោយចាប់ផ្ដើមពីកីឡាករនីមួយៗ រួមទាំងអ្នកគាំទ្រផងដែរ។ អ្នកគាំទ្រពិតជាសំខាន់ខ្លាំងណាស់ ពេលលេងក្នុងដីខ្លួនឯង ដូច្នេះសង្ឃឹមថា អ្នកគាំទ្រនឹងមកគាំទ្រឲ្យបានច្រើនពេញទំហឹង។ ពួកយើងត្រូវការស៊ុត Liverpool ត្រឹមតែ ២-០ មិនចាំបាច់ ៣-០ នោះទេ ព្រោះយើងនឹងអាចស៊ុតថែមនៅវគ្គ១៥នាទី២ដងទៀត។ គោលដៅរបស់យើងគឺ ចង់ទម្លាក់ Liverpool ឲ្យបាន។
Jürgen Klopp អ្នកចាត់ការក្រុម Liverpool៖ “នេះជាលើកទី៣ហើយ ដែលយើងប៉ះ Man Utd តាំងពីខ្ញុំមកដឹកនាំក្រុម។ ខ្ញុំគិតថា Man Utd ក៏នៅមានឱកាស១០០% នៅឡើយ ប៉ុន្តែពួកយើងដឹងហើយថា នឹងត្រូវតទល់ជាមួយគេយ៉ាងណា ខ្ញុំគ្មានបារម្ភរឿងអ្វីទាំងអស់។ យើងបានមកហ្វឹកហាត់នៅ Old Trafford ហើយខ្ញុំពិតជាចូលចិត្តបរិយាកាសនៅទីនេះ…សង្ឃឹមថាបរិយាកាសនឹង កាន់តែល្អ ដល់ពេលប្រកួត”។
ជើងកីឡាករ៖
ម្ចាស់ផ្ទះ Man Utd នឹងអវត្តមានកីឡាករសំខាន់ដូចជា ប្រធានក្រុម Wayne Rooney (របួសជង្គង់), Luke Shaw (កជើង), Phil Jones (កជើង), Antonio Valencia (របួសជើង)។ រីឯខ្សែបម្រើ Ashley Young និងខ្សែការពារវ័យក្មេង Cameron Borthwick-Jackson បានត្រឡប់មកហ្វឹកហាត់វិញហើយ ខណៈដែលខ្សែបម្រើ Bastian Schweinsteiger អាចនឹងចូលលេងដំបូងបានវិញផងដែរ។ ដូច្នេះ១១នាក់ដំបូងរបស់បិសាចក្រហម អាចជា៖ De Gea; Varela, Smalling, Blind, Rojo; Schweinsteiger, Schneiderlin; Martial, Herrera, Lingard; Rashford។
រីឯក្រុមភ្ញៀវ Liverpool នឹងអវត្តមានខ្សែការពារ Joe Gomez (របួសជង្គង់), ខ្សែការពារ Martin Skrtel (សរសៃពួរ), ខ្សែប្រយុទ្ធ Danny Ings (ជង្គង់) និងខ្សែបម្រើ Lucas (របួសភ្លៅ) ប៉ុន្តែខ្សែបម្រើ James Milner ដែលអវត្តមានកាលជើងទី១ ដោយសារឈឺនោះ បានត្រឡប់មកហ្វឹកហាត់វិញហើយ។ ដូច្នេះ១១នាក់ដំបូងរបស់ហង្សក្រហម អាចជា៖ Mignolet; Clyne, Lovren, Sakho, Moreno; Henderson, Can, Milner; Coutinho, Firmino, Sturridge។
ប្រវត្តិជួបគ្នា និងស្ថិតិមួយចំនួន៖
– ក្រុមទាំង២នេះប៉ះគ្នានៅលីគ១៦៦ដង Man Utd ឈ្នះ៦៧, Liverpool ឈ្នះ៥៥, ស្មើ៤៤។ ប៉ុន្តែនៅ Premier League ៤ប្រកួតចុងក្រោយ Man Utd ឈ្នះទាំង៤។
– ក្រុមទាំង២នេះទើបតែប៉ះគ្នានៅក្របខ័ណ្ឌអឺរ៉ុបលើកទី១ នៅរដូវកាលនេះទេ ខណៈដែលលទ្ធផលកាលជើងទី១គឺ Liverpool ឈ្នះ ២-០ ស៊ុតដោយ Daniel Sturridge និង Roberto Firmino។
– Man Utd ឈ្នះគ្រប់ប្រកួតទាំងអស់ ក្នុងជំនួបពានរង្វាន់អឺរ៉ុប UEFA ក្នុងដីខ្លួនឯង ទល់នឹងក្រុមនៅប្រទេសអង់គ្លេស។ រីឯ Liverpool មិនទាន់ស្គាល់ពាក្យថា “ឈ្នះ” នៅឡើយទេ ពេលប៉ះក្រុមអង់គ្លេសនៅក្របខ័ណ្ឌអឺរ៉ុបក្រៅដីកន្លងមក៕
No comments:
Post a Comment